სკოლების მხარდამჭერი პროექტის პილოტირება

2025 წელს საგანმანათლებლო კვლევების ეროვნულმა ცენტრმა სკოლების მხარდამჭერი პროექტის ფარგლებში შექმნილი ონლაინ პლატფორმა შესთავაზა საქართველოს ყველა სკოლას.

პლატფორმა სამ მიმართულებას აერთიანებს:

ტესტების ლაბორატორია უზრუნველყოფს საერთაშორისო შეფასებებში (PIRLS, TIMSS, PISA) გამოყენებულ თუ მსგავს, ქართველი სპეციალისტების მიერ შექმნილ ტესტურ დავალებებზე თანაბარ წვდომას მასწავლებლებისა და მოსწავლეებისათვის, ასევე ყველა დაინტერესებული პირისათვის; სამომავლოდ ამ მიმართულებით სკოლის პედაგოგების ჩართვა იგეგმება.

უკუკავშირის სისტემა სკოლებს მიაწვდის პერსონიფიცირებულ უკუკავშირს, რაც შესაძლებლობას მისცემს სკოლას, სანდო მონაცემებზე დაყრდნობით დაგეგმოს ცვლილებები სასწავლო პროცესში და გააუმჯობესოს შესაბამისი მიმართულებები.

დამატებითი რესურსების სივრცე, რომელიც არა მხოლოდ საგანმანათლებლო კვლევებსა და მათ შედეგებს გააცნობს სასკოლო საზოგადოებას, არამედ დიდ ყურადღებას დაუთმობს კვლევის შედეგების სკოლის დონეზე გამოყენების საუკეთესო პრაქტიკების განხილვას.

პლატფორმის პილოტირება მარტისა და აპრილის თვეში შედგა. პილოტირების პროცესში საქართველოს პრაქტიკულად ყველა სკოლამ მიიღო მონაწილეობა.

პილოტირების შედეგების ანალიზი პლატფორმის გაუმჯობესებისა და მომხმარებლების მოთხოვნებზე მაქსიმალურად მორგების შესაძლებლობაა.

სკოლების მხარდამჭერი პლატფორმის მიზანია, იქცეს სივრცედ, რომელიც დამატებითი საგანმანათლებლო რესურსი იქნება სკოლებისათვის, მოსწავლეთა ოჯახებისათვის.

პლატფორმა სკოლებთან, განათლების სპეციალისტებთან მჭიდრო თანამშრომლობით განვითარდება.