TIMSS - მათემატიკისა და საბუნებისმეტყველო საგნების სწავლისა და სწავლების საერთაშორისო კვლევა 

TIMSS არის ფართომასშტაბიანი საერთაშორისო შეფასება, რომელიც 1995 წლიდან ყოველ ოთხ წელიწადში ერთხელ ტარდება და ზომავს მე-4 და მე-8 კლასის მოსწავლეთა აკადემიურ მიღწევებს მათემატიკასა და საბუნებისმეტყველო მეცნიერებებში. კვლევა უზრუნველყოფს სწავლების ხარისხის შედარებით ანალიზს სხვადასხვა ქვეყანაში, რაც განათლების პოლიტიკის შემქმნელებს, მკვლევრებსა და პრაქტიკოსებს ეხმარება საგანმანათლებლო სისტემების შეფასებასა და გაუმჯობესებაში.

​

• განათლების პოლიტიკის დამგეგმავებს TIMSS აწვდის მტკიცებულებებზე დაფუძნებულ მონაცემებს ეროვნული საგანმანათლებლო პოლიტიკის, სასწავლო პროგრამების ეფექტიანობისა და საერთაშორისო კონკურენტუნარიანობის შესახებ. ის ეხმარება სახელმწიფო სტრუქტურებს STEM განათლების ძლიერი და სუსტი მხარეების გამოვლენასა და მიზნობრივი რეფორმების განხორციელებაში.

​​

• სკოლებისათვის TIMSS კვლევა იძლევა მნიშვნელოვან მონაცემებს იმაზე, თუ როგორ აისახება სასკოლო რესურსები, სწავლების სტრატეგიები და მოსწავლეთა სოციალური-ეკონომიკური ფაქტორები აკადემიურ მიღწევებზე. ეს ინფორმაცია სკოლებს საშუალებას აძლევს, გააუმჯობესონ სწავლების ხარისხი და უკეთ გაანაწილონ არსებული რესურსები

 

• მასწავლებლებისთვის TIMSS აღწერს სასწავლო მეთოდებს, პროფესიული განვითარების საჭიროებებსა და საკლასო პრაქტიკას. კვლევის მიგნებები მასწავლებლებს სთავაზობს საერთაშორისო გამოცდილებას, რომელიც ხელს უწყობს სწავლების პროცესის გაუმჯობესებასა და უფრო ეფექტური პედაგოგიური სტრატეგიების განვითარებას.

 

• მოსწავლეებისთვის TIMSS-ის შედეგები საინტერესოა არა მხოლოდ იმიტომ, რომ ზომავს მოსწავლეთა ცოდნასა და პრობლემის გადაჭრის უნარებს, არამედ იკვლევს მათ მოტივაციას, ჩართულობასა და STEM საგნებისადმი დამოკიდებულებას. ეს ინფორმაცია ხელს უწყობს სწავლის პროცესის უკეთ ორგანიზებას და თვითეფექტურობის გაუმჯობესებას.

​

მნიშვნელოვანია, რომ TIMSS არა მხოლოდ აკადემიური მიღწევების შედარებას ემსახურება, არამედ აგროვებს კონტექსტუალურ მონაცემებს სასწავლო პროგრამებზე, სასკოლო გარემოზე და სასწავლო პრაქტიკებზე, რაც მას განათლების კვლევისა და სისტემური გაუმჯობესების მნიშვნელოვან ინსტრუმენტად აქცევს.